विप्लव समूहका बारा सेक्रेटरी पक्राउ ,,

भदौ २८ , काठमान्डौ – सरकारबाट प्रतिबन्धित गरिएको पार्टी नेत्रविक्रम चन्द (विप्लव) समूहका बारा जिल्ला सेक्रेटरी आतिश मिश्रा राजन गिरीलाई प्रहरीले पक्राउ गरेको छ ।

बाराको परवानीपुर-४ श्रीपुरबाट जिल्ला प्रहरी कार्यालयको टोलीले शुक्रबार उनलाई पक्राउ गरेको हो । बाराका प्रहरी अधिकारीहरुका अनुसार जिल्लामा ठूलो घटना गराउने योजना बनाइरहेको अवस्थामा मिश्रालाई पक्राउ गरिएको थियो ।

उनी पहिलेदेखि नै आपराधिक गतिविधिमा संलग्न रहेको र उनीमाथि बिभिन्न मुद्दाहरु पनि रहेकाले पक्राउ गर्नु परेको प्रहरी अधिकारीहरु बताउँछन् । मिश्राले भारतीय नम्बर प्लेटका गाडी आगजनी,गरेको व्यवसायीलाई चन्दाका लागि धम्क्याएको आरोप छ ।

मिश्रामाथि हत्या, डाँका, फिरौती, चन्दा आतंकलगायतका आधा दर्जनभन्दा बढी मुद्दा रहेकाले पक्राउ गरिएको प्रहरीले जनाएको छ ।मिश्रालाई जिल्ला अदालतबाट पाँच दिनको म्याद थप गरी अनुसन्धान अघि बढाइएको बाराका एसपी विकासराज खनालले जानकारी दिए ।