काठमान्डौ – नेकपा माओवादी केन्द्रका अध्यक्ष पुष्पकमल दाहाल प्रचण्डमाथि सुरक्षा थ्रेट बढेको भन्दै सरकारले डीएसपीको कमाण्डमा थप प्रहरी टोली खटाएको छ ।
प्रधानमन्त्री शेरबहादुर देउवा नेतृत्वको सरकारले प्रचण्डमाथि ‘सुरक्षा थ्रेट’ बढेको भन्दै शनिबारदेखि प्रचण्डको सुरक्षामा थप प्रहरी खटाएको हो ।
सरकारको निर्णयबाट शनिबारदेखि डीएसपीको कमाण्डमा थप प्रहरी खुमलटार आइसकेको श्रोतले जनाएको छ । यसअघि केपी शर्मा ओली नेतृत्वको सरकारले प्रचण्डको सुरक्षामा तैनाथ नेपाल प्रहरी र सशस्त्र प्रहरीका ५३ जनालाई फिर्ता गरेको थियो।
अहिले माओवादीको समर्थनमा प्रधानमन्त्री बनेका देउवाले प्रचण्डमाथि सुरक्षा थ्रेट बढेको निचोड निकाल्दै थप प्रहरी पठाएका हुन् ।
अगुवा गाडीका लागि डीएसपीसहितका प्रहरी गएको स्रोतले जनायो । सरकारले अगुवा हटाएर पछुवा मात्रै राखिदिएको थियो । तर अब प्रचण्डलाई अगाडि पछाडि दुवैतिरबाट सशस्त्र र नेपाल प्रहरीले सुरक्षा दिनेछन् ।’
ओली सरकारले फिर्ता लैजानुअघि प्रचण्डको सुरक्षामा नेपाल प्रहरीका डीएसपीको कमाण्डमा २६ जना र सशस्त्र प्रहरीका इन्स्पेक्टरको कमाण्डमा ४७ जना परिचालित थिए ।
