साउन ९ ,इटहरी- अपहरण गरेर कुटपिट गर्ने तिन जनालाई प्रहरीले पक्राउ गरेको छ। यस्तै अपहरणमा परेका एक जनालाई इटहरी प्रहरीले उद्दार गरेको छ।
पक्राउ पर्नेमा इटहरी ७ का २५ वर्षीय संगित थापा, १९ वर्षका अनिष कार्की र इटहरी ८ का २३ वर्षीय सिद्धार्थ राई छन् । उनीहरुले इटहरी ४ का २२ वर्षीय निर्मल श्रेष्ठलाई अपहरण गरेर इटहरी ८ फुलबारी टोलको प्लटिङमा कुटपिट गरेको प्रहरीले जनाएको छ।
आँखामा पट्टी बाँधेर पैदलै हिडाउँदै उक्त प्लटिङमा लगेर कुटपिट गरेको प्रहरीले जनाएको हो। प्रहरीका अनुसार श्रेष्ठलाई बिहीबार दिउँसो इटहरी ९ भोजपुरे टोलबाट जबरजस्ती सिटी सफारीमा राखी आँखामा पट्टी बाँधी अपहरण गरिएको बुझीएको छ ।
विभिन्न स्थान घुमाउँदै रात परेपछि संगित थापाको घरमा थुनेर राखेको र भोलिपल्ट प्लटिङमा लगेर कुटपिट गरेको प्रहरीले जनाएको हो । पक्राउ परेका तिन जनालाई अपहरण तथा शरीर बन्धक सम्बन्धी कसूरमा जाहेरी दर्ता गराई कारबाही अगाडी बढाईएको छ। अपहरणको कारण भने प्रहरीले खुलाएको छैन।
