काठमान्डौ – धनकुटामा श्रीमतीको हत्या गरी घरभित्रै गाडेको आरोपमा प्रहरीले श्रीमानलाई पक्राउ गरेको छ। धनकुटा नगरपालिका-४ छारागाउँकी ५२ वर्षीया श्रीमती सीता श्रेष्ठको हत्या गर्ने श्रीमान ५२ वर्षीय सीताराम भन्ने सीताकुमार श्रेष्ठलाई पक्क्राउ गरिएको जिल्ला प्रहरी कार्यालयका प्रहरी नायब उपरीक्षक सुरज कार्कीले जानकारी दिए।
उनका अनुसार सीता पुस १६ गतेदेखि बेपत्ता थिइन्। घरायसी विवाद भएपछि उनी घरबाट बेपत्ता भएको भन्ने जानकारी प्रहरीलाई आएको थियो। त्यसकै केही दिनपछि पुस १९ गते उनका श्रीमान ५२ वर्षीय सीताराम भन्ने सीताकुमार श्रेष्ठ पनि बेपत्ता भएका थिए। यसरी दुबै बेपत्ता भएपछि भदाहा नाता पर्नेले प्रहरीमा हुलियासहितको उजुरी दिएका थिए।
श्रीमान पनि घर छाडेर हिँडेपछि प्रहरीलाई शंका लागेको थियो भने भदाहाले हराएको भन्दै उजुर गरेपछि प्रहरीले पुस २३ गते कुकुरसहितको टोलीले अनुसन्धान गरेको थियो।
त्यसपछि ‘डग स्नाइपिङ’ गराउँदा पनि प्रहरीले केही फेला पारेन। त्यसपछि प्रहरीले श्रीमानमाथि शंका गरेर अनुसन्धान अघि बढाएको थियो।खोज्ने क्रममा उनलाई प्रहरीले आइतबार ललितपुरको बाँडेगाउँमा फेला पारेको हो। उनलाई प्रहरीले नियन्त्रणमा लिई धनकुटा लागेको छ।
उनीमाथि सोधपुछ गर्दा आफैंले श्रीमतीको हत्या गरेको घरकै भुइँ तलामा गाडेको बयान दिएका थिए।उक्त बायाँका आधारमा प्रहरीले उनको शव फेला पारेको हो। श्रीमती सीताको शव सडेर गलिसकेको अवस्थामा प्रहरीले फेला पारेको हो। सीतारामले श्रीमती सीतामाथि कुटपिट गर्दा ज्यान गएको र घरमै गाडिदिएको बयान स्वीकार गरेका छन्।
