वीरगञ्ज – स्थानीय चुनाव नजिकिदै गर्दा नेकपा माओवादी केन्द्र पर्साका कार्यकर्ताले वीरगञ्जको राधेमाईस्थित आफ्नै कार्यालयमा तोडफोड गरेका छन् ।
पार्टीको जिल्ला नेतृत्वको गतिविधिलाई लिएर असन्तुष्ट बनेका अखिल क्रान्तिकारी मधेस प्रदेश प्रमुख सचिव जुवेर आलम, पार्टीको वीरगञ्ज महानगर उपाध्यक्षद्वय अनीरुद्ध यादव र जुमादीन अन्सारी, वडा कमिटी अध्यक्ष हिरा अन्सारी, छोटेलाल कुर्मीलगायतले कार्यालयमा तोडफोड गरेको आरोप छ ।
आसन्न स्थानीय तहको निर्वाचनका लागि पार्टीले गठन गरेको जिल्ला समन्वय समितिको गतिविधिप्रति असन्तुष्टी जनाउँदै ध्यानाकर्षण पत्र बुझाउन गएका उनीहरुले ध्यानाकर्षणपत्र बुझाउन जाँदा विवाद भएपछि आक्रोशमा आएर तोडफोड गरेको बुझीएको छ।
तोडफोडपछि उनीहरुले पार्टी कार्यालयमा तालाबन्दी गरेका छन् । कार्यालयमा ‘चन्दा खोरी बन्द गर’ लेखेको पोस्टर र विभिन्न बुँदामा ध्यानाकर्षण गराएको पत्रसमेत टाँसेका छन् । चन्दा असुली गरेर पार्टीलाई वदनाम गरेको भन्दै उनीहरुले पार्टीको जिल्ला संयोजक र सचिवको राजिनामा समेत मागे गरेका छन् ।
तोडफोडबाट कार्यलयमा रहेको टेबल, कुर्सी, सोफालगायतका सामग्रीमा क्षति पुगेको माओवादी केन्द्रले जनाएको छ । नेकपा माओवादी केन्द्र पर्सा जिल्ला संयोजक राम दरश कुसवाहाले पार्टीको विधि र प्रक्रिया नमान्ने अनैतिक एवं अराजक समूहले पार्टी कार्यालयमा तोडफोड गरेको बताए ।
कोहि कुनै असन्तुष्टी छ भने फोनमा सोध्दा पनि सकिने ज्ञापन पत्र दिनुपर्छ भन्ने पनि होईन ,पार्टीमा कुरा राख्ने विधि र प्रक्रिया हुन्छ। तर जिल्ला इञ्चार्ज, संयोजकलाई गाली गलौज गर्ने, कार्यालयमा कुर्सी, टेबुल, तोडफोड गर्ने जस्ता अनैतिक र अराजक गतिविधि भयो । यो गलत प्रवृत्ति हो । उनीहरुलाई कारबाही हुन्छ उनले भने ।
यस्तै कसैसँग चन्दा उठाएको प्रमाण ल्याए राजनीति नै छोडिदिने उनको भनाइ छ । पार्टीको वीरगञ्ज महानगर कमिटी अध्यक्ष रहबर अन्सारीको निर्देशनमा पार्टी कार्यालयमा तोडफोड भएको संयोजक कुशवाहाले बताए ।
संयोजक कुसवाहले भने ,रहबर जीसँगै घुम्ने केटाहरु हुन्, उनकै निर्देशनमा तोडफोड भएको छ । अध्यक्ष कमरेड पनि सँगै थिए, कुरै नगरी कुर्सी टेबुल तोडफोड गर्न सुरु गरे । टेबुल, सोफा पल्टाईदिए पार्टीमा कुनै कुरामा असन्तुष्टी छ भने विधि र प्रक्रियाबाट राख्नुपर्छ । आफ्नो कर्तुत लुकाउन अरुलाई बदनाम गर्नुहुन्न, अराजक गतिविधि गर्नु हुन्न । महानगर अध्यक्ष अन्सारीले भने घटनामा आफ्नो संलग्नता नरहेको बताए । मेरो संलग्नता छ भन्नु गलत कुरा हो, यस्तै उनले पार्टीको कार्यक्रममा विन्दवासिनीमा राहेको दाबी गरे।
जिल्लामा गठबन्धन गर्ने विषयमा पालिका र वडा स्तरमा कुनै सरसल्लाह नगरेको, पार्टीका इमान्दार नेता कर्याकर्ताको चरित्र हत्या गर्न खोजेको, माओवादी पार्टीको नाममा विभिन्न कार्यालय र व्यापारिक प्रतिष्ठानमा चन्दा मागेर व्यतिगत खर्च चलाइरहेको, प्रदेश कमिटी सदस्य सिफारिस गर्दा, वाईसीएलको जिल्ला संयोजक सिफारिस गर्दा सरसल्लाह नगरेको, पार्टीको लेटर प्याड र छापको दुरुपयोग गरेको असन्तुष्ट समूहले आरोप लगाएको छ ।
अखिल क्रान्तिकारी मधेस प्रदेश प्रमुख सचिव आलमले भने तोडफोडको जिम्मेवार जिल्लाका नेताहरु नै भएको बताए । उनले भने, ‘हामी आफ्नो कुरा राख्न गएका थियौं, कार्यकर्ताहरुको कुरै नसुन्ने, आवेशमा आएर कुरा गर्ने, हैकमवादी प्रवृत्ति देखाएपछि तोडफोड भयो । यसको जिम्मेवार उहाँहरु नै हुनुहुन्छ ।
पार्टीको जिल्ला नेतृत्वले अढाई लाख रुपैयाँ बुझेर छिपहरमाई गाउँपालिकाको एक जना प्रशासकीय अधिकृतको सरुवाका लागि मन्त्रालयमा सिफारिस गरेको, पछि अरुले थाहा पाएपछि फर्जी हस्ताक्षर हो भनेर दावी गरेको, विभिन्न व्यापारीहरुसँग चन्दा लिएको प्रमाण आफूहरुसँग रहेको पनि उनको दाबी छ।
