काभ्रे – डलर साटिदिन्छु भन्दै ठगी गर्ने एक जनालाई प्रहरीले पक्राउ गरेको छ। सिन्धुपाल्चोक जिल्लाको बाह्रबिसे नगरपालिका-२ का ४० वर्षीय सोकबहादुर तामाङलाई प्रहरीले पक्राउ गरेको हो।
जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक राजकुमार श्रेष्ठका अनुसार, तामाङले डलर सटही गरिदिन्छु भन्दै ठगी गर्न लागेको जानकारी प्राप्त भएपछि जिल्ला प्रहरी कार्यालयबाट खटिएको टोलीले खोजतलास गर्दा बनेपा नगरपालिका-६ मा पर्ने जंगलबाट नियन्त्रणमा लिएको हो ।
उनको साथबाट प्रहरीले अमेरीकी डलर ५० दरको थान १३ गरी जम्मा ६५० डलर, नेपाली २० रुपैयाँको ६०० थान गरी जम्मा १२ हजार र मोबाइल ३ थान बरामद गरिएको छ । तामाङमाथि थप अनुसन्धान भइरहेको प्रहरीले जनाएको छ ।
