रंग दर्पण २३ फागुन – गायिका रेखा शाहले अाफ्नाे गायन यात्रा २५ वर्ष पुरा गरेको अवसरमा पहिलोपटक एकल गायन कार्यक्रमका साथ मञ्चमा प्रस्तुत हुने भएकी छिन् । अन्तर्राष्ट्रिय नारी दिवसका दिन पारेर यही २४ फागुनमा दरबारमार्गस्थित होटल याक एण्ड यतीमा उनको कन्सर्ट हुँदैछ ।
शाहले स्थापना गरेको सामाजिक संस्था ‘रेखा शाह फाउन्डेसन’ले आयोजना गर्न लागेको यो कार्यक्रमको सम्पूर्ण तयारी पुरा भैसकेको बताइएको छ । यो कार्यक्रममा गायिका शाहले आˆनासहित अन्य अग्रज स्रष्टाका करिब डेढ दर्जन गीत प्रस्तुत गर्ने छिन् । कार्यक्रममा उनले शान्ति ठटाल, डेजी बराइली, अरुणा लामा, नारायण गोपाल, तारादेवी, सरोज गोपाललगायतका गायक-गायिकाका कालजयी गीत-गाउने छिन् । उनलाई द लिजेन्ड व्यान्डले वाद्यवादनमा साथ दिनेछ । युगल गायनमा सुरजकुमार थापाले साथ दिने पनि उनले बताइन् ।
अन्तर्राष्ट्रिय नारी दिवसको दिन कार्यक्रम गर्न लागिएको विषयमा उनले भनिन्, ‘म अझै लैंगिक अध्ययन विषयकी विद्यार्थी भएकाले त्यो दिन नारीको सम्मानका निम्ति पनि कार्यक्रम गर्दैछु ।’
कमजोर आर्थिक अवस्था भएका बालबालिकाको शिक्षा-दीक्षामा सहयोग गर्दै आइरहेको उनको फाउन्डेसनले सोही दिन राष्ट्र र समाजमा योगदान पुर्याएका विभिन्न क्षेत्रका आधा दर्जन नारीहरुलाई नगद र ताम्रपत्रले सम्मानसमेत गर्नेछ ।
२०४९ सालमा रेडियो नेपालले आयोजना गरेको देशब्यापी लोकगीत गायनमा ‘सिमसिमे पानीमा’ ले प्रथम स्थान प्राप्त गरेपछि सांगीतिक क्षेत्रमा स्थापित भएकी गायिका शाह शास्त्रीय संगीतकी विद्यार्थीसमेत हुन् । शास्त्रीय संगीतमा सिनियर डिप्लोमा अध्ययन गरिरहेकी उनले द लाइन, आकृति, स्मृतिजस्ता एल्वमहरु प्रकाशन गरेकी छिन् । ‘तिमीलाई केही हुँदै नहोस’, ‘एक दिन तिमी फर्कि आउनेछौ’, ‘नजिक छौ तिमी’, ‘तिमी बिना म एक्लै’, ‘पोखूँ भने’ लगायतका उनका गीत चर्चित छन् ।
