१० साउन, सुर्खेत । त्रिभुवन अन्तर्राष्ट्रिय विमानस्थलबाट अझै सुन तस्करी रोकिएको छैन । साढे ३३ केजी सुन तस्करीको अनुसन्धानपछि तस्करीमा नेपाली नागरिकको संलग्नता नभयपनि विदेशी नागरिकले तस्करीलाई निरन्तरता दिइरहेको भेटिएको छ ।मंगलबार साढे ३ किलो सुनसहित दुई जना थाई नागरिकलाई विमानस्थल सुरक्षा प्रहरी कार्यालयले पक्राउ गरेको हो । जसमा मा राहदानी नम्बर एबी १३७३७९८ बाहक जुथामस जाक्पारिंकक्याकूल र राहदानी नम्बर एबी १९९९५०३ बोकेका प्रियानुम होक्छाई छन् ।
विमानस्थल प्रहरीका एसपी दिनेशराज मैनालीका अनुसार उनीहरुले सुनकै घडीको कभर, माला, बेल्टको बक्कल, चाबी लगायत बनाएर तस्करी गर्न खाजेका थिए । तर, विशेष सुराकीको आधारमा उनीहरु पक्राउ परे ।
उनीहरुलाई थप कारबाहीका लागि विमानस्थलको भन्सार कार्यालय पठाइएको प्रहरीले जनाएको छ ।यसअघि सोमबार मात्रै प्रहरीले ३ किलो ३६ ग्राम सुनसहित पाँच भारतीय नागरिकलाई पक्राउ गरेको थियो । उनीहरु पनि थाई एयरबाट बैँकक हुँदै काठमाडौँ आएका थिए ।
