रुकुमपश्चिम् – रुकुम पश्चिमको चौरजहारी नगरपालिकामा रहेको बिजयश्वरी चौरजहारी सुख्खा खानेपानी तथा सरसफाई उपभोक्ता संस्था सम्मानित भएको छ ।
खानेपानी मन्त्रालय, खानेपानी तथा ढल व्यवस्थापन विभागको ५३ औं स्थापना दिवसको अवसरमा आयोजित बिशेष समारोहका बिच संस्थाले कर्णालीमै उत्कृष्ट कार्यसम्पादन गरेको भन्दै प्रशंसा पत्रसहित सम्मान गरिएको हो ।
विभाग अन्तर्गत आर्थिक वर्ष ०८०/०८१ को अन्त्य सम्ममा कर्णाली प्रदेशभरका विभिन्न संस्थाहरु मध्य चौरजहारीको यस संस्थाले खानेपानी तथा सरसफाईको क्षेत्रमा उत्कृष्ट कार्य गरेको बताईएको छ ।
आफ्ना उपभोक्ताहरुको लागि प्रदान गरेको सुरक्षित खानेपानी आपुर्ती, उपभोक्ता हित एवम् संस्थाको समग्र कार्य प्रगती तथा स्तरबृद्धि समेतको आधारमा प्रशंसनिय कार्य गरेकोले बिजयश्वरी चौरजहारी सुख्खा खानेपानी तथा सरसफाई उपभोक्ता संस्थालाई प्रशंसा पत्र प्रदान गरिएको हो ।
विभागको स्थापना दिवसको अवसरमा संस्थाका अध्यक्ष तेजबहादुर बटालालाई उक्त प्रशसा पत्र प्रदान गर्दै सम्मान गरिएको हो । यस संस्थाले चौरजहारीमा एक घर एक खानेपानी धारा सञ्चालन गरिरहेको छ ।
