बैतडी – बैतडीमा जन्ती बोकेको जिप दुर्घटना हुँदा ५ जनाको घटनास्थलमै मृत्यु भएको छ ।
दशरथचन्द नगरपालिका-२ थलालगाउँबाट बेहुली लिएर वडा नम्बर ६ को सेरातर्फ जाँदै गरेको म १ ज ३१० नम्बरको जिप दुर्घटना भएको हो ।
जिप आईतवार राती साढे आठ बजेतिर दशरथचन्द राजमार्गको गोठलापान -झुलाघाट सडक खण्ड अन्तर्गत कलुवाड मोडमा दुर्घटनामा परेको जिल्ला प्रहरी कार्यलय बैतडिले जनाएको छ।
जिप दुर्घटनामा पाँच जनाको घटनास्थलमै मृत्यु भएको जिल्ला प्रहरी कार्यालय बैतडीका प्रहरी निरीक्षक दर्शन खड्काले जानकारी दिए । दुर्घटनामा २ जना गम्भीर घाइते भएका छन् ।
जिपमा ७ जना सवार रहेको जानकारी आएको प्रहरी निरीक्षक खड्काले बताए । जिप सडकभन्दा करिब पाँचसय मिटर तल खसेको उनले बताए । घटनाबारे थप अनुसन्धान भैइरहेको खड्काले बताए ।
