काठमाण्डाै – नेकपा (माओवादी केन्द्र) का अध्यक्ष पुष्पकमल दाहाल प्रचण्डले पूर्वसभामुख ओनसरी घर्ती प्रधानमन्त्री बन्न लायक रहेको बताएका छन।
बिहीबार काठमाडौं क्षेत्र नम्बर २ मा गठबन्धनले आयोजना गरेको चुनावी सभालाई सम्बोधन गर्दै अध्यक्ष प्रचण्डले घर्तीलाई आफूले सानैदेखि चिनेको र उहाँमा प्रधानमन्त्री बन्ने दृढता रहेको बताए ।
ओन्सरी घर्ती काठमाण्डाै क्षेत्र नम्बर २ मा प्रतिनिधि सभाकी उम्मेदवार छिन । यस्तै मङ्सिर ४ गतेको चुनावलाई नेपाली नागरिकले प्रतिगमनलाई परास्त गर्ने अवसरको रूपमा लिनुपर्ने बताए ।
अध्यक्ष प्रचण्डले केपी ओलीले संविधानमा हस्ताक्षर गरेर पनि संविधानको रक्षक र गणतन्त्रको पक्षधर हुन नसकेको आराेप लगाए।
प्रचण्डले भने ओनसरी घर्ती महिला प्रधानमन्त्री बन्न लायक सङ्घर्षशील महिला हो । त्यस कारण यस क्षेत्रका लागि एक ऐतिहासिक अवसर नै आएको छ ।
हाम्रो गठबन्धन संविधानको रक्षाको निम्ति, स्थिरता र विकासको निम्ति हो । अर्को पनि एउटा गठबन्धन छ । केपी ओलीको नेतृत्वमा । तर उनीहरू गठबन्धन भन्दैनन् ।
उनीहरू राजावादी छन् । राजतन्त्र फर्काउने कुरा गर्छन् । संविधान मिच्ने र च्यात्ने कुरा गर्छन । अनि फेरि भोट माग्न जनताकाेमा आउँछन् ।
अध्यक्ष प्रचण्डले मङ्सिर ४ गतेको चुनावमा प्रतिगमनलाई परास्त गर्न सकिए देश विकास र समृद्धिको दिशामा अघि बढ्ने विश्वाससमेत व्यक्त गरे भने गठबन्धनलाई भोट दिन सबै नेपाली जन्तामा अपिल गरे ।
