क्यालिफोर्निया – लस एन्जलस वरपर लागेको आगलागीका कारण अमेरिकी राज्य क्यालिफोर्नियामा लगभग १०,००० घरहरू जलेर नष्ट भएका छन्।
४ दिनदेखि लागिरहेको आगो लगभग ४० हजार एकडमा फैलिएको छ। त्यसमध्ये २९ हजार एकड जमिन पूर्ण रूपमा जलेको छ।
आगलागीका कारण करिब १० हजार भवनहरू ध्वस्त भएका छन्। करिब ३० हजार घरमा क्षति पुगेको छ।
आगलागीमा परी मृत्यु हुनेको संख्या शुक्रबार ७ पुगेको छ। यो लस एन्जलस र वरपरका क्षेत्रहरूमा लागेको अहिलेसम्मकै ठूलो आगलागी भएको सञ्चारमाध्यमहरुमा जनाइएको छ।
आगलागीले लस एन्जलस शहरको विलासी पालिसेड्स क्षेत्रमा रहेका धेरै हलिउड स्टारहरूको बंगलाहरू पनि ध्वस्त पारेको छ।
पेरिस हिल्टन, स्टीवन स्पिलबर्ग, म्यान्डी मूर, एश्टन कुचर लगायत धेरै हलिउड स्टारहरूको घर जलेर खरानी भएको छ। पेरिस हिल्टनको घर ७२ करोड रुपैयाँमा बनेको थियो। साथै अन्य धेरै सेलिब्रेटीहरूले आफ्नो घर छोड्नु परेको छ।
क्यालिफोर्नियामा फैलिरहेको आगोले हलिउड हिल्सको बीचमा रहेको अमेरिकी फिल्म उद्योगको ‘हलिउड बिलबोर्ड’ जल्ने खतरा बढेको छ।
लस एन्जलसमा हलिउड नामको एउटा ठाउँ छ, जसको नामबाट अमेरिकी फिल्म उद्योगको नाम हलिउड राखिएको हो।
करिब ५० हजार मानिसहरूलाई तुरुन्तै आफ्नो घर खाली गर्न भनिएको छ। करिब ३ लाख मानिसहरूलाई सुरक्षित स्थानमा जान निर्देशन दिइएको छ।
प्रशासनले शहरमा आपतकाल घोषणा गरेको छ। शनिबारसम्म आगो अझै फैलिन सक्ने चेतावनी दिएको छ। आगो अहिले पनि नियन्त्रणमा आउन सकेको छैन।
