काठमान्डौ – म माधव नेपाल हुँ
म माधव नेपाल हुँ !
म तराईको रौतहट हुँ
युगले बिर्सेको समथर अन्याय हुँ !
मैले एक्लै धेरै पटक पहाडको दुख टेकेको छु
देखेको छु गोल – भुगोलको असमान्ता !
मैले हिमालको उचाईमा गरेको छु –
जनवादि सम्मेलन !
हेर्नुहोला –
कम्युनिस्ट घोषणा पत्रमा
मैले नडराई हस्ताक्षर गरेको छु !
हेर्नुहोला –
मैले गलत विचारको विपक्षमा सहि विचार प्रस्तुत गरेको छु ।
कहिले काला मान्छेहरुको अनुहार कोपर्ने सेता मान्छेहरुलाई
ऐना देखाएको छु ।
कहिले पुड्का मान्छेहरुलाई होच्याउने मान्छेहरुलाई
खाल्डो देखाएको छु ।
कहिले भएर प्रधानमन्त्री सिंहासन चढेको छु
कहिले अपमानित भएर निरन्तर झरेको छु ।
कहिले उत्तर –
कहिले दक्षिणको व्यूह परिक्रमा गरेको छु !
कहिले जोडिएको छु
कहिले टुक्रिएको छु ।
इतिहासको कठघरामा उभिएर भन्छु –
म छिन्नविन्न छु
यद्यपि अविछिन्न छु !
म कहिले केन्द्रिय समिति
कहिले समुह बैठक हुँ
कहिले पूर्ण पार्टी हुँ !
मेरो नाम बदनाम नहोस् भनेर होइन
मेरो देश गुमनाम नहोस् भनेर
यसपालि सत्यको पक्षमा मतदान गरेको छु !
म माधव नेपाल हुँ –
निसन्देह – म नेपाल हुँ !
विधि / पद्धति र / प्रकृयाहरुलाई सोध्नु –
म को हुँ ?
लोकतन्त्र – सम्विधानवाद र / परिवर्तनलाई सोध्नु –
म को हुँ ?
आउने समयलाई सोध्नु –
म को हुँ ?
प्रिय केपि कमरेड –
प्रिय मदन कमरेड –
म / किमार्थ विभिषण होइन !
म त कालकूट विष निलेर उत्तानो परिरहेको नीलकण्ठ हुँ –
म माधव नेपाल हुँ !
साभार सुवाश बस्नेत
